P50-Mil Wagtang Sa Ransak Sa Vasquez

Surigao City (June 21) - GIBANA-BANANG MOABOT ug P50-mil ang kantidad sa mga kabtangan nga nawagtang dihang giransak ang pinuy-anan sa usa ka doctor didto sa Vasquez Street, Surigao City PNP, nagbutyag nga giransak daw sa wala pa maklarong mga kawatan ang balay ni Dra. Amelia Nambatac, didto sa Vasquez Street, Barangay Washington, Surigao City.

Sa imbestigasyon sa pulisya nasuta nga sa maong hitabo, gitangag sa mga kawatan ang canon camera balor $600 (P27,000 sa kuwarta sa Pilipinas); laing canon camera balor $500 (P22,500 sa tag P45 nga dollar-peso conversion rate) cash nga P3,500; ug Compact Disk.

Ang maong mga butang iya sa nagpuyo nga si Aleksandar Cipra, coordinator sa Development Project.

Gituohan nga ang mga suspek malampusong mitangag sa maong mga butang atol sa kusog nga pagbunok sa ulan kagahapon sa kaadlawon Hunyo 20, 2007 samtang ang mga biktima maayong pagkahinanok.

Gibutyag sa imbesitaigasyon nga ang mga suspek nakasulod pinaagi sa pagtangtang sa lima ka blades sa jalousy nga bintana didto sa first floor sa maong balay.

Gisubay na pag-ayo sa kapulisan kining maong kaso. (Jodian Jayme/Periodico Surigao)