SURIGAO KILLERS MIATAKE; BIYUDO PATAY, LAING USA SAMDAN

PATAY ANG USA KA BIYUDO, samtang samdan ang usa ka minyo dihang managlahing miatake ang Surigao Killers sa mga dapit sa Alegria ug Tubod, Surigao del Norte niadtong usa ka gabii.

Patay diha-diha dayon si Catalino Pito Y Coronel, 63 anyos, biyudo, mag-uuma, human siya gipusil sa wala mailhing killers didto sa Purok 4, San Pedro Algeria, Surigao del Norte di pa dugay.

Gawas nga wala mailhi ang killer, wala usab mahibaw-I unsang matang sa armas ang gigamit sa pagpusil ug unsa usab ang motibo niini.

Upat ka samad pinusilan ang naangkon sa biktima sa lain-laing parte sa lawas niini, hinungdan sa iyang hinanaling kamatayon.

Human sa maong panghitabo ang suspetsado mikagiw ngadto sa wala hibaw-ing lugar.

HALOS DUNGAN NIINI, didto usab sa barangay San Pablo, Tubod, Surigao del Norte usa ka Jesus Bukid Y Buaya, 49 anyos, minyo, ang gipusil sa 2 ka wala pod hiilhing tawo.

Ang biktima gipusil makaduha gamit ang kalibre .45 nga pusil hinungdan nga gidali kini pagdala ngadto sa Surigao Medical Center aron matambalan.

Sama sa nahitabo sa Alegria, ang mga suspek, human sa pagpamusil, abtik usab nga misutoy ug ikyas padulong sa Brgy. Del Rosario sakop sa lungsod sa Tubod.

Duha ka basiyo sa bala kalibre 45. ang narekober sa mga awtoridad gikan sa lugar nga nahitaboan.

Ngapadayon pa karon ang imbestigasyon sa pulisya ning duha ka kaso sa pagpamusil sa Surigao del Norte (Marx Rev Buenavidez/ Periodico Surigao, Surigao City)