USA ANG PATAY, ug usa pod ang grabe dihang gikalitan pag atake ang duha ka manag amigong nanag-inom sulod sa usa ka tindahan sa P. Reyes Streeet, Washington, Surigao City, niadtong miaging gabii.
Sumala sa Pulis report, ang namatay mao ang usa ka Richard Ramirez y Mula, 24 anyos ang edad, walay trabaho ug lumulopyo sa M. Ortiz Street, Barangay Washington, Surigao City nga nakaangkon ug daghang samad sa iyang lawasasan.
Ang laing biktima nga gibalhin ngadto sa Surigao Medical Center mao usab si Carlo Esparago, ulitawo, walay trabaho, ug taga M. Ortiz Street, Barangay Washington, Surigao City gihapon.
Matud sa imbestigasyon, samtang ang mga biktima uban sa mga amigo nag-inom sa sulod sa usa ka tindahan sa P. Reyes Street, may lain usab nga grupo ang nag-inom sa laing lamesa. Wala madugay, ang suspetsado miadto sa comfort room aron mangihi apan pagbalik niya mihapit kini sa lamesa sa mga biktima ug sawala mahibaw-i nga rason kalit lang nga gidunggab ang mga biktima sa makadaghang higayon.
Gidala dayon sa Caraga Regional Hospital ang mga biktima, apan usa kanila ang nabugtoan gyod sa gininhawa.
Apan sa follow up operations sa pulis, ming ampo ra ang suspek giilang si Rodolfo Uncla y Laurente, 34 anyos, biyudo, steel fabricator ug taga P. Reyes Street Surigao City. Ang ubang killers, nakasibat ug padayon pang gipangita sa mga pulis.
Nagpadayon pa ang imbestigasyon sa kapulisan ning maong kaso. (Periodico Surigao)
