PATAY’NG LAWAS SA BIKTIMA SA LUNOD SA SWEET MERA NAKUHA NA

NAKUHA na ang patay’ng lawas sa babayeng biktimaq sa nalunod nga pumpboat – ang M/B Sweet Mera didto sa kadagatan sa Nonoc Island, Surigao City alas 2:00 sa kaadlawon niadtong Hulyo 11, 2007.

Kini ang gikumpirma sa report sa Surigao City PNP ngado sa Surigao del Norte PPO kagahapon.

Sa maong report, gibutyag nga ang patay’ng lawas nga nakit-an didto sa baybayon sa Brgy. Talisay, Surigao City nakuha sa rescue team sa Surigao alas 7:00 na sa buntag kagahapon, Hulyo 12, ug gidali sa pagdala ngadto sa Aldonza Funeral Homes, Surigao City.

Sumala sa pulis report, ang biktima namatay sa pagkalumos dihangh nalunod ang gisakyang MB Sweet Mera.

Giila ang patay’ng lawas nga iya sa usa ka Florencia Alinsunod y Binongo, 68-anyos ang edad, minyo, Brgy. Councilor sa Malinao, Tubajon, Dinagat Province.

Gibutyag sa usa ka mga sakop sa MB Sweet Mera nga ala 1:00 sa kaadlawon niadtong Hulyo 11, 2007, nagsakay sila sa pump boat gikan sa Brgy Malinao, Tubajon uban upat ka mga crew members ug lima ka mga pasahero apil na ang biktima paingon sa Surigao City.

Pag-abot nila duol sa Nonoc Island, Surigao City, nakasinati sila ug dagkong balod nga midaut sa ilang pumpboat hinungdan sa pagkalunod.

Walo sa siyam ka mga sakay sa pump boat ang naluwas sa miagi nga motorbanca, apan ang namatay, wala dayon igkita.

Mao nalay nahibaw-an nga gidagsa na kini ngadto sa baybayon sa Barangay Talisay, Nonoc Island, Surigao City. (Jodian Jayme/Periodico Surigao)