ALEGRIA PNP CHIEF GI- AMBUSH SA DAVAO; HENERAL “UTOK” SA PAGPATAY?

Kusog ang istorya karon nga lagmit usa ka heneral ang posibleng utok o nagpaluyo sa nahitabong pagpatay kang P/Senior Inspector Godofredo Guiritan, didto sa Matina Crossing, Davao City niadtong usa ka adlaw.

Apan ang Davao City police Office ubos ni S/Supt. Jaime Morente wala pay natumbok nga suspetsado.

Gitug-an ni Morente, kagahapong adlawa lang nila namugna ang Taskforce Guiritan, usa ka pundok nga gitahasan sa pagsubay sa matuod nga nagpaluyo ning maong krimen.

Ang Taskforce Guiritan, gilangkuban sa Talomo PNP, Investigation section sa DCPO, Criminal Investigation and Detection Group (CIDG) og SOCO nga gipanguluhan ni Supt. Joseph Sepulchre.

Si Morente wala mohatag ug tagal kanus-a nila matapos ang pakisusi sa pag pusil kang Guiritan.

Sa pagduaw ni Morente ngadto sa haya sa namatay, walay nakuhang dinagkong kalamboan ang mga imbestigador, apan gibutyag nga si Guiritan sawala pa gipatay Crossing Matina, gikan pa kini sa Campo Catitiapan kay mitambong sa husay saw ala masayri nga kaso.

Nasayran sa Periodico nga si Guiritan niadto lang petsa dos gitudlo isip hepe sa Alegria Police Station, sa lalawigan sa Surigao del Norte, ug usa palang ka semana siyang na umentuhan sa iyang ranggo isip kapitan.

Base sa progress report sa Talomo PNP, ang wala matino nga gidaghanon sa mga killers nga migamit pa gyud ug .45 kalibre nga pusil, base pod sa duha ka basiyo sa bala nga nahipos sa mga elemento sa soco.

Si Guiritan nagpangidaron pa ug 49 anyos ug nagpuyo sa Gulf View Subdivision, sa sakop sa Bago Aplaya.

Kaniadto si Guiritan nadestino sa City Mobile Group (CMG) sa Davao City Police Office. (Periodico Surigao)