WANTED GIDAKOP, MISUKOL, NAPUSILAN

Napusilan sa mga pulis ang usa ka pinangita sa balaod dihang misukol kini samtang gidakop didto sa sa Brgy. Matin-ao, Burgos, Surigao del Norte, alas 9:00 ang takna niadtong miaging gabii.

Ang mga sakop sa San Isidro Municipal Police Station miila sa suspetsado nga si Samson Bueges y Ramboyong, 40 anyos, mag-uuma ug molupyo sa nahisgutang dapit. Si Bueges, mao ang ika 18 sa 20 ka labing mga pinangitang mga tawo sa lalawigan sa Surigao del Norte.

Ang mga Pulis nga nangita kaniya, gipangunahan ni P/Insp. Dick Antipasado Cale, hepe sa San Isidro Police.

Ang pagdakop sa akusado, subay usab sa Warrant of Arrest nga gipirmahan ni Judge Rolando T. Literato, Presiding Judge sa MTCT San Isidro ug Del Carmen, Surigao del Norte, tungod sa kasong “Frustrated Homicide”, nga naka docket sa Criminal Case no. 2001-15 ug may gitakdang piyansa nga P60,000.00.

Sa dihang gidakop kini, ang suspetsado mitago sa ilang panimalay ug misukol pinaagi sa pag una ug pusil sa mga tinugyanan sa balaod nga nag paingon sa iyang nahimutangan. Kini ang naka-aghat sa kapolisan sa pagbalos sa pagpusil, ug giigo kini sa tiil aron ma neutralisar.

Nakuha gikan sa suspetsado ang usa ka improvised 35.16 revolver nga may serial no. 541317 nga may lima ka mga bala, usa ka improvised homemade shotgun nga may banana type nga magazine nga may upat ka wa pakaboto nga mga bala.

Ang dinakpan gidala sa Dapa District Hospital aron matambalan.

Kasamtangang gi-detene siya karon sa San Isidro Municipal Jail, samtang ang laing kaso sa paglapas sa RA 8294(Illegal Possession of Firearms and Ammunitions) ug direct assault to persons in authority giandam usab batok kaniya sa korte. (Periodico Butuan)