NA-BARA NGA FERRY SA LAWOD SA SURIGAO TANANG PASAHERO NALUWAS NA  

HINGPIT NA nga naluwas kagahapon ang tanang mga pasahero sa na-bara nga ferryboat sa tunga-tunga sa kadagatan sa Surigao City ug Dinagat Island.

Matud sa report sa Philippine Coastguard, alas 2:30 sa hapon kagahapon, ang ML NEWS MPC 4 nga gipanag-iya ug gipadagan sa MULTI-PURPOSE COOP OF SAN JOSE sa Dinagat Province, maoy miboluntaryo sa pagkuha sa mga pasahero gikan sa na-bara nga barko ang SUPER SHUTTLE FERRY 10.

Sa ulahing report nga nakutlo usab sa Periodico Surigao, giklaro nga ang tanang mga pasahero gidala ngadto sa lungsod sa San Jose, Dinagat. Gitakdang dalhon sila sa Surigao City sakay sa tugboat MBCA B & D LILIAN.

Kahinumduman nga unang mireport sa coastguard ang manager sa MV Super Shuttle Ferry 10, niadtong alas 12:30 sa Hulyo 11 nga ang ilang ferryboat nga naglawig gikan sa Lipata, Surigao City paingon sa pantalan sa Liloan, Southern Leyte nadaut ang makina tungod sa dagkong balod nga midabo-dabo niini bandang alas 9:00 sa buntag niadtong Hulyo 11, 2007 didto sa Isla sa Sumilom , Surigao City.

Gilayong mipadala ang Coastguard Surigao sa ilang tugboat ngadto sa maong lugar, aron unta sa pagluwas dayon sa mga pasahero ug crew members ug aron guyuron ang na-bara nga ferryboat. Apan pakyas ang tugboat ug napugos sa pagbalik sa pantalan sa Surigao gumikan sa kadagko usab sa balod ug hangin didto sa lawod.

Bandang alas 4:45 sa hapon, napugos na sa paghulog sa iyang pondo ang ferryboat didto sa gilay-ong usa ka milya sa aminahang bahin sa Isla sa Rizal, Basilisa, Dinagat Province.

Ang MV SUPER SHUTTLE FERRY 10 nga gipanag-iya sa ASIAN MARINE TRANSPORT CORP (AMTC) ug gidumala ni Captain Perigrino Colis, adunay 41 ka mga dagkong tawo na nga sakay, usa ka bata, ug siyam ka mga 6-wheeler trucks kagahapon, alas 7:40 sa buntag, ang mga sakop sa Coastguard Surigao nga gipanguluhan sa Station Commander , uban ang QUICK ACTION RESPONSE TEAM (QART) sa Surigao City, misakay sa MBCA B & D LILIAN paingon sa nagpondo nga MV SUPER SHUTTLE FERRY 10 duol sa Rizal Island, Dinagat aron bantayan ang pag-transfer sa 42 ka mga pasahero ngadto sa laing sakayan sa dagat.

Pagka-alas 9:10 sa buntag kagahapon, gisugdan gilayon ang pag transfer sa mga pasahero paingon sa MBCA apan tungod sa kadagko sa balod, tulo lang gyod sa pasahero una ang nahakot tungod kay ang MBCA napugos sa pagtago didto sa pantalan sa Roxas samtang nagpaabot nga moabot ang supply sa mga pagkaon gikan sa Dinagat nga ipangapo-apod ngadto sa mga pasahero.

Kagahapon, alas 2:00 sa hapon, miabot usab ang helicopter sa Philippine Air Force aron paghakot sa mga pagkaon nga hinatag sa local nga gobyerno sa Surigao City alang sa mga pasahero sa MV SUPER SHUTTLE FERRY 10.

Alas 3:00 na sa hapon kagahapon nga nahurot sa paghakot ang tanang mga pasahero sa ferryboat ug gidala ngadto sa San Jose. (Jodian Jayme/Periodico Surigao)

AddThis Social Bookmark Button

0 comments

Post a Comment