PAGDAGIT SA MGA MILITANTE SA SURIGAO, PULIS BLANGKO GIHAPON

Blangko pa gihapon ang kapolisan sa rehiyon sa gidangatan sa duha ka mga militante nga giingong gipangdagit, didto sa Surigao City ug gituohang gidala sa dakbayan sa Butuan.

Atol sa Press Conference kagahapon, gisulti ni Caraga PNP Director, Chief Supt. Antonio D. Nañas, nga ang gituohang pagpangdagit, nahitabo niadto pang alas 11:00 sa buntag sa Hulyo 5, apan kagahapon lamang sa buntag nadawat sa Rehiyonal nga buhatan sa kapolisan.

Sumala sa naulahing taho sa Surigao City Police Station, ang duha ka mga biktima mao sila si Dagane Caronilla Butug, 24, usa ka farmer organizer nga taga Brgy. Los Angeles, Butuan City ug Narciso Antigulas, 24, PISTON Organizer Nga taga Trimoso, Surigao City.

Sumala ni Michael Antigulas, amahan ni Narciso, nga ang mga biktima nagsakay sa single nga motorsiklo (Motorstar) nga gimaneho ni Narciso Antiguas paingon sa Brgy. Anomar, Surigao City.

Paglabay nila sa tulay sa Sangay, gidasmagan sila sa usa ka green nga double cab pick-up sa ilang likod hinungdan nga nangahulog ang duruha sa yuta.

Pagkahuman, duha ka wala hiilhing mga tawo ang mikanaug gikan sa mibanggang sakyanan ug gipusasan si Dagane Butug, Moikyas na unta si Antiguas, apan mi pabuto ang mga suspetsado sa ilang dala nga mga armas, hinungdan nga napaatras kini. Giapil pod kini pag-posas.

Ang duruha gi sakay dayon sa green nga sakyanan ug mihaguros paingon sa direkyon sa Butuan City. Daling mipasangil ang mga militanteng mga pundok sa Butuan nga ang nahitabo, binuhatan sa mga pulis kon dili man mga military. Apan sumala ni Nañas, dili unta modali-dali ug himog mga alegasyon ni pasangil sa maong hitabo, tungod kay gihimo naman sa kapolisan ang mga lakang alang sa pag-imbestiga niini.

Naglisud lang ang pulis , matud ni Nañas, tungod kay wala gilayon gitaho ang maong hitabo.

Bisan gani ang giingon nga mipadulong kini sa Butuan, dili kaayo masiguro kon dinhi ba gayud sa siyudad mipaingon, tungod kay daghan man ang posibleng matipasan nga dalan una modangat sa siyudad sa Butuan.

Mahimo man gani usab, matud ni Nañas, nga moingon ang kapolisan nga binuhatan ang nahitabo, sa CPP/NPA tungod kay dili na nila mapuslan ang maong mga tawo, ug aron aduna silay ika-propaganda batok sa gobyerno. Apan ang mga pamahayag nga sama niini , sumala ni Nañas , mga “pre-mature pronouncements” ug angayang likayan una sa pagka-karon tungod kay padayon pa man ang gipahigayon nga imbestigasyon.

Mipasalig , si Nañas nga himuon ang tanan sa kapolisan aron mahatagan sa kasulbaran ang maong hitabo.(Jodian Jayme - Periodico Surigao)