13th Siargao Int’l Surfing Pruweba sa Pagka-Surfing Capital sa Surigao Norte

GIPALIG-ON PAGSAMOT ug gipamatud-an sa makausa pa sa 13^th Siargao International Surfing Competition sa General Luna, Siargao Island, nga ang Surigao del Norte mao gayod ang Surfing capital sa Pilipinas.

Ang torneyo nga gitawag pod ug 1^st Billabong Cloud 9 Invitational, malampusong misuyop sa 45 ka nga international surfers gikan sa lain-laing nasod sa kalibutan ngadto sa gitawag ug “surfing paradise in the country.”

Ang torneyo nga gisugdan niadtong September 24 ug gitapos niadtong Sabado, September 29 miguyod sa mga surfers gikan sa nasod sa Australya ug bisan na sa Amerika.

Sa kumpetisyon, migawas nga kampeon si Australian surfer Wade Goodall,, nga miparot sa defending Champion niadtong miaging tuig nga si Ryan Hipwood nga taga Mermaid Beach, Queensland, Australia. Si Sunshine Coast surfing star Goodall midawat sa first prize nga US$7,500.00 gikan sa Billabong, usa ka surfing company sa Australia, atol sa culmination ceremony niadtong sabado.

Ang ubang mga mananaug, nag-apil nila ni Australian Nick Vasicek – 1^st runner-up; Dave Reardon Smith sa Australya gihapon – 2^nd runner-up, ug Makua Rothman sa Hawaii – 3^rd runner up.

Ang katapusang adlaw sa torneyo gitambungan mismo sa anak ni Presidente Gloria Macapagal-Arroyo nga si Luli Macapagal-Arroyo. (Fryan/Periodico Surigao)