Surigaonon Nagbangotan sa Kamatayon ni Atty. Tecson

NAGBANGOTAN karon ang katawhang Surigaonon tungod sa kamatayon ni Atty. Maria Jeanette Tecson, kinsa gibalita nga nakit-an na lang nga patay na sulod sa usa ka hotel sa Metro Manila.

Si Tecson, giilang usa ka outstanding Surigaonon tungod usab sa iyang dinagkong kalihukan didto sa kaulohan. Nabantog kini isip usa sa mga abogado nga mipasaka sa disqualification case batok ni anhing Fernando Poe Jr., ato sa 2004 presidential elections, diin gikwestyon niini hangtud sa Korte Suprema ang citizenship sa aktor.

Nahimo pod nga tigpamaba sa Yuchengco Group of Companies – Pacific Plans, Inc. si Tecson, way labot pa sa iyang pagka-abogada ni Ilocos Norte Rep. Ferdinand ‘Bongbong’ Marcos, Jr.

Subay sa report ni Pasig Police Chief, Senior Supt. Francisco Uyami, si Maria Jeanette Tecson, 40-anyos nga taga Yeloowbell Street, Lexington Garden Village, Ortigas Avenue, nakit-ang wa nay kinabuhi alas 8:30 sa gabii niadtong Sabado, September 29 sulod sa Room 2004 sa Richmonde Hotel sa San Miguel Avenue, Barangay San Antonio. Nagpadayon pa ang imbestigasyon sa Pulis-Pasig ning maong kaso.

Sa pagkasayod sa gidangatan ni Tecson, nagiyahay lang ug pakita sa ilang “tribute” ang mga Surigaonon.

Si District I – Board Member, Simeon Vicente G. Castrence, nagpasar ug usa ka resolusyon sa Sangguniang Panlalawigan diin gipadayag ang dakong simpatiya ngadto sa abogada. (gikan sa report ni Fryan E. Abkilan, PIA-Surigao del Norte)