Kawat Battery Na Pod Uso Sa Surigao

DAW GIHIMONG USO karon ang kawat-battery sa sakyanan.

Nasuta kini sa sunod-sunod nga kaso sa kawat-battery nga gipatala ngadto sa Surigao City PNP.

Sumala sa pulis report, usa ka Jenneto Emong, 38-anyos ang edad, minyo ug driver nga taga Ozamis City, nga nagpuyo sa Scrapan Kaskag, Brgy. Washington, Surigao City ang nagpatabang sa pulisya human namatikdan nga nawagtang na ang tulo ka mga bateriya sa iyang gimanehong sakyanan nga usa ka Mitsubishi Canter nga gipanag-iya sa GREATER RJ “Appliance Center”.

Sumala sa driver ang tulo ka mga bateriya, gikawat samtang gi-parking ang sakyanan sa Narciso, Rizal Street, particular na sa Shell Gas Station.

Walay nakakita sa pagkawat, ug walay nakaila sa mga suspek.

Wala pod madugay nagpatala ang usa ka Kyran Eder, 45-anyos ang edad, minyo ug OIC karon sa MR. DONUT nga anaa nahimutang sa Luneta Arcade, ug kasamtanganng nanimuyo sa Gem Complex, Ceniza Heights, Brgy. Washington, Surigao City.

Sa iyang asoy sa pulisya, gisulti sa biktima nga BATTERY sa MR. DONUT “pick-up”, kalit lang nawala ug gituohan kining gitangag na usab sa wala mailhing kawatan.

Ang kawat nahitabo samtang giparada ang maong pick-up didto sa gawas sa Gem Complex, Ceniza Heights, Brgy. Washington, Surigao City.

Sama sa miaging kaso sa kawat-battery, blangko ang pulisya kinsa kining misiaw karon nga KAWATAN-BATTERY sa Surigao City. (Jodian Jayme)