Suspek Sa Isnats Cellphone Sikop Na Gyod

NAARESTO NA GYOD ang gipasanginlang “mantas nga isnatser” ug cellphone sa Surigao City, atol sa gihimong operasyon sa Pulisya didto sa Magallanes Street, Surigao City alas 4:15 ang takna sa hapon niadtong usa ka adlaw.

Wala makapalag ang suspek nga si Bryan Montañez Villanueva, 22-anyos ang edad, ulitawo ug walay trabaho nga molupyo sa Magallanes Street, Surigao City dihang gibitbit kini nila ni PO3 Gipala ug PO2 Dumay, pulos sakop sa Surigao City Police Station traffic unit, human kini gitudlong maoy ming-isnats sa usa ka N7650, kolor blue ug itom nga cellphone gikan sa biktimang si John Kevin Caga Ricafort, 15-anyos nga estudyante ug molupyo sa Narciso Street, Surigao City.

Sumala sa imbestigasyon, samtang didto ang biktima sa usa ka cellphone shop sa Magallanes St. aron iuli ang bag-ong palit nga cellphone sa iyang amigong si Roger Macabenta, nga taga Kaskag, kalit lang kining gisakmit sa suspek nga paspas kaayong mikaratil ug dagan paingon sa Pantalan 1.

Wala hinuon magdugay, nadakpan kini sa mga istambay sa lugar ug gi-turn-over ngadto sa mga pulis nga mao nay midala sa dinakpan ngadto sa kapolisan.

Ang suspek, una hinuon ma-turnover sa pulis, nakatilaw ug kulata sa mga istambay busa naputos kini sa mga bun-og dihang gihatag na ngadto sa kapolisan.

Nabawi ra ang N7650 nga gi-isnats nga cellphone. Naglaguklok na karon sa presohan sa Surigao City PNP ang dinakpan, samtang giandam ang tukmang kaso labot sa iyang kalapasan. (Jodian Jayme)