Capitol Wa Pay Sweldo, SP, Trabahante Mingtyabaw

PAREHONG NAGTIYABAW karon ang mga opisyales ug empleyado sa local nga gobyerno sa kapitolyo sa Surigao del Norte tungod sa nabalda nga mga suhol.

Si Board Member Leonila Gorgolon Licuan, mipadayag sa iyang pagkadismaya sa pagka delatar sa suhol nilang mga opisyales ug mga empleyado sa probinsiya.

Wala makasabot ang taga Sanggunian labaw na gyod ang mga empleyado sa provincial government ngano nga kapin petsa 20 na sa Enero, wala pa gyod gihapon nila madawat ang ilang suhol para sa Enero 15.

“Until now we have not received (our salary), I did not receive my own pay/compensation for this month, within the period. I don’t know if other members of the board if they have checked their ATM cards,” matod ni Board Member Leonila G. Licuan.

Matud ni Sangguniang Panlalawigan Secretary Rodulf Valentino Sering, gisugdan na nila ang pag proseso sa payroll sa taga Sangguniang Panlalawigan. Giesplikar pod matud sa report sa taga Provincial Budget Office, nga karong semanaha magsugod na sila sa pag proseso sa suhol sa mga trabahante sa gobyerno.

Gi-angkon niini nga na de-latar ang pag proseso niini gumikan kay nahimong busy usab ang mga kadagkoan ng Provincial Budget, Accounting ug Treasurers Office, gumikan sa nagpatong-patong nga papeles sa mga transaksyon ilabina kay gi-uswag ang deadline para sa pag proseso sa mga bayronon sa tuig 2007.

Gibutyag sa balita nga karong Enero lang gyod nahatagan ug pagtagad ang lain-laing departamento sa probinsiya ilabi na ang mga papeles nga kinahanglanon para sa pag proseso sa ilang tagsa-tagsa ka mga payroll.

Gipasalig hinuon ni Vice-Governor Noel Catre nga molihok kini alang sa daling kasulbaran sa problema.

Ang bise gobernador gitakdang makigkita ngadto sa kadagkoan sa Provincial Accounting, Budget ug Treasurer office nga ipaklaro ang matuod nga hinungdan sa pagkalangan sa pag-release sa suhol sa mga opisyales ug empleyado sa provincial government. (Airen I. Sinday)