Sa Surigao British National Nagsuicide

Patay na dihang nadiskubrehan ang usa ka British national nga gituohang nag-suicide didto sa ilang pinuy-anan sa Spanish Road, Ceniza Heights, Surigao City alas 5:30 ang takna niadtong miaging hapon.

Giila sa pulis report ang biktima nga mao si Peter Terence Hoy, 52-anyos, minyo ug usa ka British national.

Si retired P/Inspector Nenita Virtudazo Dubduban na maoy nagpahibalo ngadto sa Surigao City Police Station (SCPS) sa maong hitabo.

Sumala sa imbestigasyon, sa wala pa ang maong insedente, ang biktima ug ang iyang asawa bag-o lang nahiabot gikan nagpa-check up didto sa Sugbu.

Pagka-alas 4:15 sa hapon niadtong miaging adlaw, ang asawa nga si Angelina Gloria Hoy migawas una aron magpalit ug snacks ug aron kuhaon usab ang iyang anak nga nagtungha sa Surigao Education Center (SEC).

Usa lang nga nahibilin sa ilang balay ang British national, apan pag-abli sa iyang asawa sa ilang balay bandang alas 6:00 na sa hapon, mao nalay iyang nakita ang iyang bana nga naghigda nga wala nay kinabuhi didto sa ilang comfort room.

Ang mga sakop sa SOCO nakarekober ug usa ka caliber .45 pistol nga Shooter ang brand, usa ka magazine nga may lima ka wala pa makabuto nga mga bala.

May usa pa ka bala sa chamber sa pusil, ug laing usa ka basiyo.

Walay timaan sa kasamok nga namatikdan ang mga taga SOCO atol sa ocular inspection.

Gidala dayon ngadto Nilo Funeral Homes alang sa awtopsiya.