Sales Clerk Biktima Sa Isnats, P70-Mil Wagtang

Wagtang ang P70,000 nga kuwarta dihang gilabni sa wala mailhi nga mga suspek ang usa ka shoulder bag sa usa Sales Clerk, didto sa Amat St., Cor. Diez St., Surigao City alas 12:20 sa udtong tutok niadtong miaging adlaw.

Ang taho sa Surigao City Police Station nga gipadangat ning rehiyon, miila sa biktima nga mao si Erlinda Lorete y Madelo, 39-anyos, Sales Clerk sa VSJ General Merchandize, ug molupyo sa Espina Ext., Surigao City.

Base sa imbestigasyon sa Surigao City Police, si Lorete naglingkod sa front seat sa tricycle nga gimaneho ni Marianito Moselina gikan sa Metrobank paingon sa Espina St.

Paghidangat sa tricycle sa Amat, mihunong ang sakyanan, dayon kalit nga mitungha ang duha ka mga suspetsado.

Gilabni dayon sa mga suspek ang shoulder bag nga gisudlan sa cash.

Human nakuha ang bag, paspas nga misirit ang mga suspek sakay gihapon sa usa ka Motorsiklo nga Honda Wave nga nagsunod ra usab kanila. Ang maong motor, giingong may Plate No. KJ 6159. Ang hiniusang team sa Surigao del Norte Provincial police ug Surigao City Police Station mihimo dayon ug follow-up operations, nga miresulta sa pagkasikop sa usa sa mga suspetsado nga giila nga mao si Josue Joro-Joro Salvador, 28-anyos, tricycle driver ug taga Purok Katipunana, San Francisco, Surigao del Norte.

Ang suspetsado nailhan sa mga saksi. Ang kaso pinaagi sa inquest proceedings gipasaka n asa Surigao City Prosecutor’s Office nga naka-docket ubos sa I.S No. 2008-036.