“ANI NAN SINING SURIGAO” Natapos nga Malampuson
Malampusong natapos kagahapong adlawa ang usa ka semana nga kalihukan “ Ani nan Sining Surigao “ Phil. Arts Festival 2008 nga gisugdan niadtong Febrero 21, 2008. Ang maong kalihukan gipasiugdahan sa National Commission for Culture and Arts ug sa Surigaonon Heritage Studies Center uban ang mga pag-abag sa kagamhanan sa dakbayan ug lalawigan.
Mga kultura sa Surigao sama sa mga awit o kanta, balak, sajaw (folk dances) nga pulos gihan-ay ug gitagit sa mga Lumad nga Surigaonon ang gipakita ug gipabati sa mga katawhan sa mga presentasyon nga gihimo sa kiosk diha sa luneta ingon man sa City Gym.
Si Ms. Sol Corong ang information officer sa National Commission for culture and Arts mibutyag sa Radyo Ronda nga ang tanang mga pasundayag ilang gi-documento ug kini pagatipigan alang sa musunod nga mga henerasyon ug iyang gipasalamatan ang Surigaonon Heritage Studies Center nga gipangulohan ni Mr. Fernando Almeda Jr., nga gidawat sa hagit alang sa pag-utingkay ug pagtipig sa mga kulturang Surigaonon. Gipasidunggan usab ang SHC sa paningkamot nga mabarog ang Museo nan Surigao nga nahimutang sa Surigao Boulevard.
Matud ni Ms. Corong nga ang usa ka dapit ug katawhan dili mahimong molambo ngadto sa unahan kon dili nila lingi-on pagtan-aw ang kasaysayan sa ilang kaliwatan diha sa cultura ug arte (culture & arts).
Ang Surigaonon Heritage Studies Center masaligon nga ang natipigan nga Culture and Arts sa Surigao del Norte mahimo unyang mapakita sa mga dumodo-ong ( domestic or foreign tourist ) sa diha nga matapos na unya ang usa ka mini theater nga ipahimutang sulod karon sa gitukod nga provincial gym sa may sports complex.
Sa pikas nga bahin napahimutang na karon sulod sa Museo nan Surigao ang mga hulagway sa mga Mayor sa dakbayan nga gipintal ni Engr. Manuel Mendros.
Kagahapon sa hapon gipahigayon ang koronasyon sa Little Miss Bito-on nan Surigao 2008 nga si Trisha S. Gubaton gikan sa Special Science Elementary School sa Division of Surigao City samtang ang 1st princess mao si Steffi C. Siervo gikan sa Banban Elementary School, Tagana-an District ug ang 2nd princess mao si si Elaina Jane R. Seraspe samtang ang Miss Bito-on nan Surigao 2008 mao si Ronalyn R. Monte gikan sa Tubajon National High School, division of Dinagat Islands ang 1st princess mao si Christine Jane E. Luib gikan sa Surigao del Norte national High School u gang 2nd princess mao si Glenmaries C. Siervo. Ang nagkorona mao si Mayor Ronald Luib sa lungsod sa Tubajon, Province of Dinagat Islands.
Ang NCCA ug SHC nagpasalamat sa tanan nga mi-bulig sa kalampusan sa “Ani nan Sining Surigao," Philippine Arts Festival 2008. (RPN-DXKS)
