Pulis Caraga Alerto Batok NPA
Gi-alerto dayon ni Caraga PNP Chief Supt. Jaime E. Milla ang mga estasyon sa kapolisan, ilabi na ang mga nahimutangan sa hilit nga mga dapit sa Caraga Region, aron dili sila malusutan sa PATRAYDOR nga pagpangsulong sa mga NPA.
Ang mando ni Milla, bunga pod sa report sa pagsulong sa mga NPA ngadto sa usa ka detachment sa CAFGU didto sa Brgy. Hinapuyan, Carmen, Surigao del Sur alas 3:00 pasado sa kaadlawon kagahapon.
Sa report nga nahiabot sa Caraga PNP, gibutyag nga duha ka mga platoon sa mga NPA nga gipangunahan sa wala pa masayri nga lider, ubos sa Northeastern Mindanao Revolutionary Comité (NEMRC), ang misulong, apan tungod sa maigmat nga pagbantay, nakasukol gyod ang mga CAFGU ug nakadagan ang mga rebelde.
Sa radio message ngadto sa tanang buhatan sa kapolisan, gimandoan ni Milla ang tanang estasyon sa pag-monitor sa ilang tagsa-tagsa ka mga areas, labot sa hulga sa posibleng pagpanghasi sa mga kaaway.
Ang maong kamandoan, gipasa na usab ni PSSupt. Admirante Josué ngadto sa tanan niyang mga presinto sa Butuan City Police Office. Mimando usab si Josué nga dili lamang higpitan ang pagbantay sa mga estasyon kondili, kusgan pa god ang mga check-points aron mabantayan ang posibleng pag-agi sa mga samarong sakop sa kaaway nga mahimong dalhon sa mga hospital sa Butuan.
Hinuon sa pagsulat niining maong balita, wala pay taho ang mga kapolisan kon may mga nakabsan sa kinabuhi o mga nanga-angol atol sa gipahigayong pagpanghasi.
