Kotseng Honda Mihalok sa Gemelita: 2 Patay, 2 Grabe

DUHA ANG PATAY, ug duha usab ang grabe dihang mihalok ang usa ka kotseng Honda ngadto sa kahoy nga gemelina didto sa National Highway, Brgy. Upper Libas, Tagana-an, Surigao del Norte di pa lang dugay.

Matud sa pulis report, ang nadisgrasyang sakyanan, usa ka kolor maroon nga awto, Honda ang brand ug may plate number THY 619 nga gipanag-iya ni Nelan Alipao ug gimaneho ni NELAN ALIPAO JR Y PARAN, 31-anyos ang edad, minyo ug usa ka kagawad sa Brgy. Sampaguita, Tagana-an.

Subay sa imbestigasyon, ang sakyanan nagdagan gikan sa Tagana-an paingon sa Surigao City, apan igo pa naka-abot sa Upper Libas, nawad-an na ug kontrol sa sakyanan ang driver.

Sanglit wa nay kontrol ang sakyanan, mideretso sa pagdasmag sa usa ka punoang Gemelina didto sa bakilid nga bahin sa karsada.

Tungod sa impact sa pagbangga, parehong grabe ang mga sakay sa kotse, apil na ang driver nga si Nelan Alipao, Jr., GILBERT ROBANTES Y CABALLERO, taga Brgy. Azucena, Tagana-an; VALENTIN BAYON Y CORVERA, taga Brgy. Sampaguita, Tagana-an, ug NORIEL BAYETA Y ALIPAO, 27 anyos, usa ka ulitawo.

Gidali sa pagadla ang mga biktima ngadto sa Medical Center sa Surigao City aron tabangon, apan wala gayod magdugay ang kinabuhi nila ni Nelan Alipao Jr., ang driver ug Valentin Bayon.

Nagpadayon pa ang imbestigasyon ning maong report. (Airen Sinday)