Driver Pick up sa Hit and Run Nadakpan Na

Nadakpan na gyod and driver sa pick up nga suspek sa nahitabong Hit & Run didto sa Purok 5, barangay Alipao, Alegria, Surigao del Norte alas 3:00 sa hapon niadtong Abril 20, 2008.

Patay sa maong Hit & Run si Eduardo Badajos Ugay, 69 anyos, minyo, nga taga Purok 5, Brgy. Alipao, Alegria.

Nasakpan gyod sa Alegria PNP si Aminoden Bazer Marohom, taga Sarreal Avenue, Bayan Luma 2, Imus Cavite, ang driver sa kolor itom nga Mitsubishi Estrada nga may plate number VVU-661 ug gipanag-iya ni Jamal Salic, dihang naapsan didto sa Lavender Shell Station, Surigao City.

Matud sa unang report, human nadasmagan, imbes tabangon ang biktimang tigulang, misutoy hinuon ang maong sakyanan, busa napugos ang mga awtoridad sa paghimo ug follow-up operations.

Gikan sa Surigao City, ang driver ug ang sakyanan, gitakdang dalhon ngadto sa Alegria PNP alang sa dugang disposisyon.

Giandam na ang tukmang kaso batok sa dinakpan.