Hit and Run Padayon sa Surigao

Morag nahimong uso karon ang kasong Hit & Run sa Surigao City ug Surigao del Norte.

Wala pa gani hingpit masulbad ang kasong pagligis patay sa usa ka 69-anyos nga tigulang sa Alegria, laing kaso na usab ang gitaho nga nahitabo sa checkpoint, Kilometro 3, Surigao City ala 1:30 sa kaadlawon niadtong miaging adlaw. Matud sa pulis report, gibiyaan lang sa nakabanggang dump truck ang sakay sa gidasmagan niining motorsiklo.

Ang report nagpasabot nga usa ka YAMAHA CRYPTON nga may plate number UU 1892, nga gipanag-iya ug gimaneho ni Rogelio Baga, nga taga Capitol Hills, Surigao City ang nadasmagan sa usa ka Dump truck nga may plate number KDA 330.

Ang pagkadasmag nahitabo dihang ang motorsiklo mikalit ug liko sa junction sa Maharlika Highway.

Imbes mohunong ug ipahiluna ang biktima, misutoy hinuon ang dump truck, biniyaan ang driver nga grabe ang kahimtang.


May nakakita hinuon sa maong hitabo, busa gidala pagdali ngadto sa Medical Center ang biktimang driver diin gitaho anaa sa kuyaw nga sitwasyon.