Mister Gi-Hit & Run, Bisan Daghan Tawo

NA-LANDING GYOD sa tambalanan ang usa ka 48-anyos nga mister human kini gi-hit and run didto sa San Nicolas Street, Surigao City, atubangan sa sa daghang nagtan-aw nga mga tawo, banding alas 5:01 sa hapon bag-uhay pa lamang.

Si DAVID ESCABAL y SIBUNGA, 48-anyos, minyo ug molupyo sa Purok 3, Brgy. San Juan, Surigao City, gidali sa pagdala sa hospital human siya gidasmagan sa usa ka motorized tricycle.

Sumala sa imbestigasyon, ang tricycle nagdagan sa San Nicolas Street, paingon sa sidlakang direksyon sa siyudad sa Surigao dihang pag-abot sa atbang sa Jollibee, kalit lang nga milabang sa dalan ang biktima.

Tungod sa kakalit sa hitabo, nadasmagan si Escabal ug natumba ngadto sa sementadong dalan.

Gidali dayon kini pagdala ngadto sa Caraga Regional Hospital apan sa pagsulat aning maong report wala pay klarong impormasyon nga nakaabot sa PERIODICO, labot sa aktuwal nga kahimtang sa biktima.

Ang nakadasmag nga sakyanan, imbes nga mutabang sa iyang nabiktima, mipaturatoy hinuon sa pagdagan paingon saw ala matino nga direksyon.