Nasikop sa mga sakop sa Placer Municipal Police Station, sa Placer, Surigao del Norte ang usa ka wanted sa kasong “Murder” didto sa Brgy. Banban, Taganaan, Surigao del Norte alas 11:00 sa buntag niadtong niadtong usa ka adlaw.

Ang pinangita nga si Reynaldo Ejandra y Chato, 40-anyos ang edad, molupyo sa barangay Banban, nasikop sa kapolisan sa Placer nga gipanguluhan ni SPO2 Arsenio Sepe Galgo, base sa Arrest Warrant nga gipirmahan ni Judge Floripinas C Buyser, sa RTC Branch 30, Surigao City nga naka-docket ubos sa Criminal Case No. 7937 sa kasong “Murder.” Walay piyansa nga girekomenda ang korte alang sa temporaryong kagawasan sa akusado.

Ang dinakpan gidetene karon sa Placer PNP, samtang gipaabot ang sunod nga mando sa korte.

Read More...

WALA MAKA-ANGAY ang mga kongresista sa Caraga Region ngadto sa gipalakaw karon nga matud pa “pagbalhin-balhin” sa mga opisyales sa Department of Environment and Natural Resources (DENR) sa lain-laing dapit sa Caraga Region.

Ang mga kongresista naghangyo karon kang Environment Secretary Jose L. Atienza, Jr. nga pugngan ang pagbalhin-balhin sa mga forestry officials sa lain-laing lugar sa rehiyon.

Sa ilang sulat kang Atienza naghangyo ang mga congressmen nga “no movement of personnel whatsoever” kung dili konsultahon. Gitumbok sa sulat sa mga kongresista ang matud pa gipatuman nga revamp ni DENR Northeastern Mindanao OIC, Forester Edilberto Buiser, bisan kung walay konsultasyon sa mga kongresista sa lain-laing distrito sa Caraga.

Dili gusto ang mga kongresista nga hilabtan ni Buiser ang nanglingkod sa upat ka mga Provincial Environment and Natural Resources Offricers (PENRO’s) ug 13 ka mga Community Environment and Natural Resources Officers (CENRO’s) sa lima ka mga lalawigan, ug unom ka mga dakbayan sa Amihanang sidlakan Mindanao.

“We are very much alarmed to have learned of this developedment which we believe will be counter-productive to the various initiatives in the environment and natural resources sector now gaining momentum in the region,” matud sa sulat sa mga kongresista nga gikutlo pod sa report kagahapon.

“We strongly believe that this is a matter that warrants consultations with the local officials in the region who are the most active partners and allies in the implementation of the department’s programs and projects,” asoy sa sulat sa mga kongresista.

Apan dako ang katingala ni Caraga region DENR’s OIC Forester Buiser sa maong report.

Giklaro ni Buiser nga “no mass transfer or reassignment of PENRO’s and CENRO’s” nga iyang gipatuman sa rehiyon.

Iyang gisulti nga lain-laing mga DENR employees, personnel ug trabahador sa lain-laing dapit sa rehiyon, nag-una karon sa pagpatuman sa mga development programs, environment preservation and forest protection programs sa iyang buhatan.

Read More...

Here’s another buzz from Kag. Boyet Bonite, niadtong miaging sesyon sa konseho mipasar ug resolusyon si Kag. Bonite nga maghimo ug usa ka activity sa boulevard kada biyernes ug sabado para daw mabalik ang kabibo sa maong dapit. Iya kining gitawag nga “Surigao Night Café.”

Sa iyang resolusyon iyang giawhag ang mga negosyante nga magbutang ug stall, mapagkaon man o ukay-ukay didto sa boulevard nga magsugod alas 6 sa gabie ug matapos sa alas 2 kaadlawon. Umay tan-aw nijo ini na proposal ni Kag. Bonite, musalir kaha ini sa mga Surigaonon?

***

Uyy, may CDF nasab kuno an ato mga Board Members, kaswerte sab nila, hehe. Sa pakighinabi bag-uhay pa lamang sa atong Bise Gobernador Noel P. Catre, si Catre nagkanayon nga tanang Board Members regardless daw sa ilang political affiliation pagahatagan na ug initial CDF (CDF ang gitawag niani ni Catre - Countrywide Dev't Fund man ini sa mga kongresista) nga nagkantidad ug 100,000 gikan kini sa opisina sa Gobernador, Gov. Ace Barbers.

Giklaro ni Catre nga pasiuna ra daw kini kay basi sa sunod nga tuig muincrease pa kini. Sa pamahayag sa Bise Gobernador, iyang gi-awhag ang mga Board Members sa pagprioritize sa mga proyekto nga sa tan-aw nila importante kaayo nga matapos karong tuiga.

Read More...

Usa ka patay'ng lawas sa usa ka 3-anyos nga batang babaye, ang napalgan sa mga residente nga naglutaw-lutaw sa tubigong bahin duol sa baybayon sa Lake Mainit, partikular na didto sa Sitio Cabugao, Brgy. San Pablo, lungsod sa Jabonga, Agusan del Norte alas 10:00 sa buntag kagahapon.

Ang patay nga lawas ni Lyn (dili tinuod nga ngalan) 3-anyos, nakuha sa Jabonga Municipal Police Station, nga gipangulohan ni PS/Insp. Fedrico Dacera, hepe sa maong buhatan, ug maoy nagpa-awtopsiya sa bata didto sa Jabonga Municipal Hospital.

Ang duty physician sa maong hospital mitaho nga ang bata posibleng giabusuhan o gilugos una gipatay sa bangis (violent) nga paagi, ug gilabay ang patay nga lawas niini sa Linaw.

Ang amahang si Kardo, 43-anyos, usa ka mag-uuma ug molupyo sa nahisgutang dapit, gipangita karon sa kapulisan tungod kay gitudlo kining maoy suspetsado sa maong mangilngig nga panghitabo.

ang imbestigasyon sa kapulisan mipakita usab nga si Kardo mi-abandona sa pamilya niini. Gimando na ni PS/Supt. Benson Leleng, Director sa Agusan del Norte PPO ngadto sa hepe sa kapulisan sa Jabonga, ang subsob nga pagpangita sa suspetsado aron manubag kini sa maong salaod.

Ang patay nga lawas sa biktima anaa karon sa kustodiya sa Barangay Kapitan sa maong barangay alang sa tukma nga disposasyon.

Read More...

Ubay ubay na mga investors an kuman nagkainteres na muinvest sa syudad sa Surigao, isa na ini an Davao Central Warehouse, na sa laong ni Mayor Pons sa ija interview, isa kini sa mga dagku na tindahan nan grocery and hardware sa Davao.

Sa laong pa ni Mayor Pons, an plano na site na butangan jaon kanto pasingod sa Bernadette Village.

Plano na ini muopen kuman disyembre. Dugang sab niini an Citi Hardware sa pamahayag ni Mayor Pons nagplano pod nga magtukod sa ilang negosyo sa syudad ang problema lang kay hantod karon wala pa sila makakita nan luna.

Sa laong pa ni Mayor, welcome karajaw ini na developments sa Surigao. Tana matinuod gajud ini.

Read More...

Laing kampo na pod sa New People’s Army (NPA) ang nailog sa military, matud sa report sa Armed Forces of the Philippines (AFP) di palang dugay.

Ang report nagtug-an nga ang way undang nga kampanya sa 4th Infantry Division sa Philippine Army batok sa mga rebelde, misakmit sa duha ka mga kampo sa NPA sulod lang sa duha ka semana.

Si Major Mitchelle Anayron, Regional Army Spokesman nagpasabot nga ang labing ulahing kampong nailog sa military mao ang duha ka kuta sa NPA nga nahimutang sa Parangparang, Barangay Mabini, habagatang bahin sa Surigao.

Matud sa report, mingresponde ang militar sa pahibalo sa mga sibilyan labot sa presensya sa mga armadong NPA. Nag-abot ang duha ka puwersa busa nahitabo ang binayloay sa mga bala.

“The encountered communist insurgents were believed to be the forward security elements of the NPA camp. After 30 minutes fierce firefight, the rebels along their un-accounted number of wounded abandoned their camp and fled in disarray”, asoy ni Anayron.

Narekober gikan sa kampo ang mga claymore mines, Granada, wa pa makabuto nga mga bala, personal nga kagamitan sa mga NPA ug ubay-ubay nga mga dokumentong subersibo.

Ang follow-up combat operation nga gihimo pod sa 30th Infantry Battalion miresulta pod sa laing engkwentro didto gihapon sa barangay Mabini.

Sa maong giyera, narekober sa mga military ang usa ka M16 Armalite rifle, daghang mga bala sa M203 ug M16 ug mga subersibong dokumento.

“It is believed that the running NPA rebels suffered heavy casualties and are now in total disarray as AFP troops intensified its combat operations in the area and its adjacent barangays” si Anayron miingon.

Walay samdan o napatay sa bahin sa military. Ang epektibong pagtabang sa katawhan maoy giilang dakong tabang sa military sa pagpuhag sa NPA.

Read More...

GIBATI og dakong kabalaka ang mga mulopyo sa Mainit, Surigao del Norte sa plano karon sa dakong kompaniya nga tabangan ang mga gagmay'ng mamulawanay nga motukod og mga mga kooperatiba aron mougmad na ang ilang panginabuhian diha sa ilang giminahan sa mga kabukiran sa Mt. de la Rama ug mga kasikbit nga kabukiran. Ang mga nagpakabanang mga Mainitnon lakip na kadtong nanarbaho sa Manila ug abroad mipahungaw sa ilang mga reaksyon pinaagi sa ilang "Pidjanga sa Mainit" nga blogsite nga gimintinar sa akong higala nga si Zimm Mosende kay matud pa nila ang maong laraw nagpadugang lang hinoun sa ilang gikahadlokan nga magusbat na gayud hinoun ang halapad nga Lake Mainit nga sa pagkakaron anaa na gani sa peligro nga kahimtang.

Ubay-ubay na nga mga kulokabildo ang nabutang sa maong blogsite ug kini bunga sa mga pag-inambitay sa mga kasayuran bisan pa man gani ang usa ka Ameikano nga naka-asawa og Mainitnon nga migogl pa og panahon sa pagtuki sa mga hiyas sa mga suba ug uban pang mga tubig-agianan palibot sa maong dakong danaw nga angayan na pangitaan og mga alternatibong paagi aron masulbad ang matag tuig nga kasinatian sa goub kon baha tungod sa sobrang paglapaw sa tubig nga molunop sa tibouk sentro sa Mainit. Mao pod kini ang hagbay ra nga mga sugyot sa Lake Mainit Development Authority nga nagtoun usab sa mga pamaagi dili lang sa pagsulbad sa baha apan ang malahutayong solusyon aron masalbar ang Lake Mainit gikan sa mga nangabuso sa iyang kinaiyahan kinsa maoy nag-inusarang tinubdan sa kinabuhi ug kaugmaon sa mga lungsoranon bisan pa man ang mga silingang lungsod sa Jabonga, Kitcharao ug uban pang lungsod sa Agusan del Norte. Hangtud karon wa pa gayud intawon makonkreto ang laraw sa LMDA , usa ka NGO nga gitabangan sa financial nga instiusyon sa Australia, kay lagi mogogol man og binilyon ka pesos nga pundo aron matuman ang ilang alternatibong solusyon. Bout ipasabot dako na ang damyos ang nabuhat sa maong danaw nga nanginahanglan og dako kayo nga kantidad aron mahibalik ang iyang kinaiyahan. Ang gibuhat na lang sa mga nagpakabanang lungsoranon mao ang pagpananum sa mga kahoy nga bangkal ( klase sa bakhaw nga dali mabuhi sa danaw) ug gani naandan na kini nga tinuig nga kalihokan sa reunion sa mga balibayan nga Mainitnon lakip na si Zimm.

Dili baya tiaw kining gipadangat nga kabalaka sa mga Mainitnon dili lang tungod sa kalisod nga ilang nasinati tungod sa goub apan sa ilang nadiskubrehan niadtong 2006 sa mga dagkong like sa yuta diha sa tiilan sa Mt. de la Rama ubos lang sa San Francisco Elementary School nga kung dili kini mahatagan og hinanaling aksyon dakong purohan ang gikahadlokang lahi na pod nga trahedya sama sa St. Bernard sa Southern Leyte diin tibouk katilingban natabonan sa yuta tungod sa pagdahili sa mga bulto sa yuta gikan sa bukid. "Dili na pod kami motugot nga matagmataman ang laing kasinatian sa SURICON", saysay sa usa ka lungsoranon nga gipost sa Pidjanga blogsite. Mao nga karon dasig kayo sila Zimm ug uban pang mga tagilungsod bisan tua didto sa abroad sa pagbutang sa ilang mga panghunahuna ug mga reaksyon aron ipadangat sa mga hingtungdan nga anaa sa gobyerno nga molihok na sa dili pa ulahi ang tanan. Dakong babag gayud sila sa maong laraw sa maong kompaniya sa minahan kay nagduda gayud sila nga paon lang kini aron dawaton unya sa mga katilingban palibot sa Lake Mainit ang ilang naghipe nga laraw nga magtukod og dakong minahan sa maong mga kabukiran kay nakita man nila ang dakong tinubdan sa bulawan ug uban pang mahalon nga deposito sa mineral.

Ambot pod kaha kung nahigmata na bisan kining atong mga opisyal sa kalungsoran palibot sa Lake Mainit. Mabalaka pod ko nga kini sila mahimong ma-agni sa mga tanyag sa maong kompaniya nga sarang maghatag og kaayohan sa ilang mga dapit ug dako gayud og ikatabang sa ilang political careers apan sa kadiyot lang nga malipayong panahon ug dili gayud mahimong malahutayong solusyon alang sa kaayohan sa maanindot nga Lake Mainit. Hinaut unta nga magmata na pod kamo ug dili gayud unta ipatigbabaw ang kaugalingong interes kay ang ugma damlag gayud ang manudya diha kaninyo pag-abot sa panahon.

Read More...

Gibutyag karon ni ex-Gob. Lyndon Barbers ang plano sa Asian Spirit sa pagbalik niini sa ilang operasyon karong Hunyo 9.

Sa usa ka radio interview, giyagyag usab ni Barbers ang mga plano sa airline company sa paghatag ug mga promo fares para sa mga Surigaonon. Gitin-aw ni Barbers nga gimitingan pa hantud karon kung unsa orasa mugikan ug mularga paingon diri sa Surigao ang eroplano nga sa ingon ni Barbers ‘83-seater BAe 146 aircraft’ ang pagagamiton nga mularga kalima sa usa ka semana.

Dugang pod niini, gifinalize na usab ang mga preparasyon sa PAL Express sa ilang plano sa pagbiyahe diri sa Surigao karong Agosto.

Read More...

Malampusong gibuksan ang Department of Foreign Affairs – Regional Consular Office 13, sa 2nd Floor CESIA Building, Montilla Blvd., Butuan City, uban kang Pangulong Gloria Macapagal Arroyo isip pinasidunggang bisita, kagahapon sa buntag.

Midangat ang Pangulo alas 12:25 kagahapon sa udto, gikan sa dakbayan sa Cagayan de Oro. Kuyog sa Presidente sila si Speaker Prospero Nograles, DOT Sec. Joseph “Ace” Durano ug pipila pa ka mga sakop sa cabinet.

Ang grupo sa Presidente gitagbo sa tugpahanan sa Bancasi nila ni 1st District Congressman Jose “Joboy” Aquino II, 2nd District Congressman Edelmiro Edel Amante, Butuan City Mayor Democrito Plaza II, Agusan del Sur Gov. Valentina “Tina” Plaza, Surigao del Sur Gov. Vicente Pimentel Jr. ug uban pang mga opisyales local ning rehiyon ug sa mga line agencies sa kagamhanan.

Gibuksan ang DFA Regional Consular Office 13 human sa blessings nga gipahigayon nga misa ni Fr. Josselio Amalia ug sa pagputol sa ribbon niini pinaagi ni Pangulong Arroyo.

Human sa pagputol sa ribbon, mituyok ang pangulo suroy sa buhatan ug gisusi ang pipila ka mga pagpadagan niini.

Gilayon mibiya ang Pangulo sa venue, alang sa duha ka pribadong mga panagtagbo, didto sa “Adoration Chapel” sa 3rd Floor, Aquino Bldg. ug sa mga Directors ug mga LGU Officials sa usa sa mga inland resorts sa Butuan.

Mibiya ang pangulo alas 2:00 sa hapon paingon sa Dumaguete City.

Sa laing bahin, malampuson usab ang gipahigayong “Tree Planting” sa bukid sa Mayapay, alas 5:30-7:30 kagahapon sa buntag, nga gipangunahan ni Speaker Nograles, Ang maong kalihokan gipaluyuhan ug gipunduhan sa Contituency Office ni Cong. Aquino. Mikabat sa 1,500 ka mga representante gikan sa nagkadaiyang mga sanga ug organisasyon sa pangagamhanan.

Sumala ni DENR Regional Executive Director Buiser nga ang sunod nga lakang mao ang pagsiguro nga mabuhi ang mga kahoy nga tinanum ug hulipan ang mga nangamatay nga kahoy aron nga motubo gayud kini ug makatabang sa pagbalanse sa kinaiyahan ning rehiyon.

Read More...

Hatagan ug duha ka milyon ka pesos nga balor sa Patrol Boat ang lungsod sa Dapa aron magamit sa paggukod sa mga malapason sa balaod sa kadagatan didto sa isla sa Siargao.

Mao kini unod sa report ni congressman Francisco “Lalo” Matugas atol sa launching sa proyektong Mari-culture Park didto sa lungsod sa Dapa di pa lang dugay. Sa iyang diskurso, gitug-an ni Matugas nga gawas sa mariculture Park, ang lungsod sa Dapa, butangan pa gyod ug usa ka patrol boat, nga sarang gamiton sa mga sulugoon sa balaod sa pagpatuman sa kadagatan.

Giilang tukma ug haom gayod ang maong patrol boat tungod kay hangtud karon nagpadayon pa gihapon ang pag-abusar sa kadagatan ilabi na sa mga dinamitero nga mopalusot sa ilang illegal nga panagat.

Ang bag-ong patrol boat alang sa lungsod sa Dapa, gikumpirma pod sa nga kadagkuan sa Bureau of Fisheries and Aquatic Resources (BFAR) pinangulohan mismo ni director Malcolm Sarmiento sa BFAR nasyonal.

Wala pa hinuon maklaro kanus-a ipadala sa Dapa ang nahisgutang patrol boat.

Read More...

GIANGKON KARON sa National Food Authority (NFA) nga gi-isnab lang sa mga mag-uuma ang ilang tanyag nga tag P17 kada kilo nga presyo sa palay nga ilang paliton. Ang mga ma-uuma nagpadayon sa pagtumod sa ilang palay ngadto sa pribadong mga negosyante gikan sa laing probinsya bisan tag P15 lang ang palit gikan kanila.

Si Sebastian Solano, NFA provincial manager sa Agusan del Sur, nagtug-an nga padayong gipakyaw sa mga negosyanteng taga Davao ug taga Cotabato ang bugas sa Agusan Su rug ginabayaran sa tag P15 kada kilo nga ubos ug P2 sa buying price sa NFA.

Aminado si Solano nga gi0isnab lang sa mga mag-uuma ang ilang gitanyag nga P17 kada kilo ug maoy gipalabi sa mga mag-uuma ang mga negosyanteng taga Davao ug taga cotabato nga gihatagan sa ilang mga produkto. Gibatbat ni Solano ang hugot nga rekisitos sa NFA sa pagpamalit ug palay, particular na ang 14prociento nga moisture content sa palay una kini-deliver sa bodega sa NFA.

Gitug-an ni Solano nga ang mga mag-uuma mas moplabi pa sa tag P15 kada kilo tungod ka yang pribadong negosyante mokuha sa ilang produkto bisan bag-ong ani ug basa pa.

Si Solano nagklaro nga tungod sa maong sistema, wala gyoy mahimo ang NFA sa pagpugong sa mga mag-uuma gikan sa pagbaligya sa ilang abot ngadto sa probadong negosyante nga dili taga Agusan del Sur.

Gipasalig hinuon sa NFA – Agusan del Sur nga dunay supisyente bugas para sa lalawigan sa panahon sa mga emerhensiya ilabi na sa mga kalamidad ug sa panahon nga magnihit ang commercial rice.

Ang mga stocks sa NFA, giilang IMPORTED o inangkat pa gikan sa laing nasod. "We have enough stocks of imported rice recently shipped to our warehouse,” asoy ni Solano ngadto sa mga miyembro sa Bantay Konsumo nga nagtigom niadtong Biyernes.

Read More...

Nasikop sa Provincial Anti Task Force nga gipanguluhan ni SPOI Andres Espina, ang usa ka negosyante atol sa buy-bust operation sulod sa lawak sa usa ka Pension House, didto sa Navarro St., Surigao City alas 5:00 niadtong miaging adlaw.

Ang taho gikan sa Surigao City Police Station nagkanayon nga ang Provincial Anti-Vice Task Force, mipahigayon sa buy-bust operation sulod sa Room 312, 3rd Floor sa Metro Pension Plaza, ug nasikop ang usa ka Geraldino Pertacorta, 48-anyos, taga White Beach, Dinagat Island Province, nga gipasanginlan nga “user” ug pusher sa ginadiling droga.

Nakuha gikan sa posesyon sa suspetsado ang 4 ka mga sachet sa gidudahang shabu nga mokantidad ug P2,000.00, ug usa ka nokia 1110 cellular phone nga blue ug puti ang kolor, P1,500.00 sa nagkadaiyang mga denominasyon ug tibuok usa ka libo ka pesos(P1,000.00) nga mayh Serial No. LX878578 ug mga sa pagyuo-yop sa ginadili nga droga.

Ang suspetsado gipreso sa SCPS samtang gi-amdam ang tukma nga kaso batok kaniya.

Read More...

Usa ka panagtigum ang gilunsad bag-uhay pa lamang sa Cabuntong Function Hall, Cabuntong Beach Resort, General Luna, Siargao Island, Surigao del Norte nga gisalmutan sa mga nagkalain laing sector sama sa mga representante gikan sa mga lain-laing ahensaya sa mga pangagamhanan, permitees kontraktor ug non-government organizations.

Namugna ang panagtigum aron hisgotan ang kaylap nga pag panguha ug igang o limestone ug buhangin sa maong isla. Ang isla sa Siargao usa sa mga nailhan nga protected area sa tibuok Pilipinas. Ang tibuok rehiyon sa Caraga aduna la’y 2 ka nailhang protected area. Ang Siargao Island Seascape and Landscape (SIPLAS) ug ang Agusan Marsh. Kon ang usa ka area ma-identify nga protected walay dapat mamahimong kalihokan ng makaguba sa maong kinaiyahan apil na ang pagpanguha sa mga fora ug fauna niini nga giila ng padulong sa pagkawala.

Tungod niini ang Pangagamhanan sa probinsya nga gidumala ni Halandong Gobernador Robert Ace S. Barbers mihatag ug instruksyon sa Provincial Environment and Management Office nga gipangulohan ni Mr. Antonieto M. Charcos nga maglungsad ug miting aron pagpasabot sa mga katawhan sa Siargao sa mamahimong epekto kon ang maong mga pagpanguha magpadayon. Ang Chairperson sa komitiba sa Environment and Natural Resources nga si Board Member Leonila G. Licuan mipaambit usab sa iyang kasinatian kon gi-unsa sa Palawan pag-amping sa ilang kinaiyahan, ug hingpit pagpatuman sa mga balaodnon niini. Si BM Jose Alabat ang Chairperson sa komitiba sa Agri-Fishery, designated Officer-in-Charge sa pagpadagan ug pagdumala sa mga kalihokan sa isla sa Siargao. Mihatag ug mensahe in behalf kang Gov. Robert Ace Barbers nga nagdasig sa mga katawhan sa pagpadayon ilabi na sa mga environmentally friedly nga mga kalihokan.

Usa ka mahinuklobon nga pamalandong ang gipaambit ni P/Supt Antonio Paquirigan ang Provincial Director sa Philippine National Police nga nag-awhag pag-amping sa atong kinaiyahan kay kini dili alang kanato karon apan, alang sa umaabot nga henerasyon nga makit-an pa nila ang mga isda sa kadagatan ug tin-aw mga kasapaan. Midugang usab siya pagduso nga uban siya sa pangagamhanan Probinsyal sa pagbatok sa illegal nga mga kalihokan mga maoy hinungdan sa pagkaguba sa kinaiyahan.

Read More...

Sa milabay nga semana diin didto nag-opisina si Gob. Ace Barbers sa iyang bag-ong satellite office sa lungsod sa Dapa, dako ang kalipay sa mga katawhan sa dala niining mga kaayohan alang kanila.

Uban ni Gob. Barbers ang health personnel sa Provincial Health Office alang na sa medical mission nga gihimo sa mga lungsod sa General Luna, Dapa ug Del Carmen, ug uban usab ang mga kawani sa Provincial Social Services Office alang na sa pagpanghatag ni Gob. Ace Barbers sa mga bugas ug pagkaon ug ang Provincial Agriculture Office nga nang apud-apod usab sa kalibo-an nga “Pinakbet” kits.

Daghan ang mipadayag sa ilang pagpadayeg sa buotang gobernador ug kadasig ug kasibot sa pagserbisyo kanila, ug sa iyang dakong pagpakabana sa ilang kahimtang.

“Akong gipanghinaot nga sa gamay namong dala nga hinabang kaninyo, kamo nalipay ug inyong mahinumdoman nga ang atong panggamhanan anaa kanunay nga nagpakabana kaninyo, nagkanayon si Gob. Ace Barbers.

Read More...

Patay deretso ang usa ka manghod, human giunay sa pagtadtad sa iyang magulang atoll sa nahitabong away sa pamilya didto sa Sityo Lahi, Barangay San Isidro, Gigaquit, Surigao del Norte alas 2:00 sa hapon niadtong miaging adlaw.

Ang biktima giilang si CARLITO ELLOREN y GIER, 28 anyos ang edad, ulitawo ug usaka mag-uuma sa Sityo Lahi.

Ang suspek mao ra pod ang iyang kaugalingong magulang nga si CARLOS ELLOREN y GIER, 42, anyos ang edad, usa ka gihapon ka mag-uuma.

Matud sa report, atol sa panag-away sa mag-soon, gitadtad sa magulang gamit ang usa ka mahait nga bolo ang iyang manghod, busa naka-angkon kini ug daghang samad sa lain-laing parte sa kalawasan. Patay diha-diha ang biktima.

Human sa pagtigbas, misibat dayon ang suspek, apan wala madugay, boluntaryo ra pod kining miampo ngadto sa Gigaquit PNP.

Personal nga dumot ang gitudlong hinungdan sa maong away. Gipreso karon ang suspek, samtang giamdam ang kaso batok kaniya.

Read More...

Deklarado karon ang gobyernong probinsyal sa Surigao del Norte nga andam kining makigbatok sa mga illegal loggers, miners ug bisan sa mga mananagat ug uban pang malapason sa palibot.

Mismong si Governor Robert Ace S. Barbers, maoy nag-una sa pagpaningkamot karon aron panalipdan ang palibot pinaagi sa Advocacy for a Clean Environment and its Sustainability (ACES) Program.

Gipalihok karon ni Gob Barbers ang tanang mga law enforcement agencies, apil na ang Philippine National Police(PNP), Armed Forces of the Philippines(AFP) ug Philippine Coast Guard(PCG) aron gukdon gyod ang tanang mga malamposon.

“We are dead-serious in enforcing environment laws, rules and regulations” pintok na pahinumdom ni Barbers,, ngadto sa tanang mga opisyales sa lain-laing ahensya sa gobyernong local ug nasyonal nga iyang gipatawag sa usa ka tigom sa Surigao City.

Sayo niini, may nanggawas nga mga balita nga tungod sa padayong pagpasagad sa tawo, nameligrong matunaw o matabunan sa tubig sa hingpit ang pipila ka isla sa nasod.

Ang gobernador nag ingon nga ang gobyernong probinsyal sa Surigao del Norte nagpakabana gayod sa pagpanalipod ug pagpreserbar sa atong palibot.

Nanawagan karon si Gob. Barbers ngadto sa tanang ahensiya sa gobyerno nga molambigit ngadto sa mga kalihokan alang sa gitawag ug environment preservation.

“This has got to stop, and we need your cooperation,” patin-aw sa gobernador.

“We must identify now the hotspot areas and let us monitor these activities, and arrest violators on the environment laws” dason sa gobernador.

Apil sa giingong lugar nga nabanhaw ang illegal nga mga kalihokan, ang pipila ka mga dapit sa mainland, Surigao del Norte.

Gilaraw karon ang pagbutang ug checkpoints batok sa illegal nga mga forest products aron kapugngan ang illegal nga pagpalusot niini.

“We will work out on putting up check points in all exit points in the province, including our ports so that the illegal transport of our forest products and mineral ores will be curtailed. I would like to give a warning to all operators and financers of illegal activities in the province causing damage to our natural resources to halt their operations because this time we are taking aggressive steps to enforce the law”. Sulti ni Gob. Barbers.

Read More...

Patay ang usa ka scuba diver human gidunggab sa usa pod ka scuba diver didto sa kanto Borromeo ug Narciso Street, Surigao City alas 10:30 sa gabii niadtong maiging adlaw.

Mismong si PO1 Plamos Kuyog sa BPSO sa Brgy Taft, Surigao City ang midala ngadto sa istasyonan sa kapolisan kang Paulino Martinito y Dequina Jr., 33-anyos, minyo ug usa ka scuba diver nga temporaryong nagpuyo sa P. Reyes – Borromeo St., Surigao City, human kini gitudlo nga maoy suspek sa pagdunggab kang Roldan Soso y Labong, 28-anyos, minyo ug usa pod ka scuba diver nga lumad sa Phase 2, Avenue 2, Blk 22-A, lot 28, dagat-dagatan, Navotas, Metro Manila nga temporaryong nanimuyo sa Surigao City.

Sumala sa report, ang biktima, uban ang iyang mga kauban sa trabaho, nanag-inom session sulod sa Junsal Videoke sa Borromeo-Narciso St.

Sa ilang paggawas, miulbo ang ilang panaglalis. Wala damha, ang suspek nga kauban ra pod sa trabaho sa biktima miabot ug wanay daghang istorya gidunggab diretso ang biktima gamit ang usa ka stainless nga kutsilyo tumong sa tiyan sa biktima, nga gidali sa pagdala ngadto sa Caraga Regional Hospital.

Pero paglabay sa usa ka oras nga pagtambal, ang mga doktor mideklara nga namatay ra gyod ang biktima.

Nadakpan hinuon ang suspek sa ming responde nga mga pulis.

Narekober gikan sa iyang posesyon ang usa ka 11-pulgada nga kutsilyo, apil na ang pulo-an.

Ang biktima gidala ngadto sa Nilo Funeral Homes, sa Km. 1, Brgy Luna, Surigao City, samtang ang suspek gitanggong sa bilanggoan

Read More...

PATAY GAYOD diretso ang usa ka konsehal human kini gi-salbids, igo lang gyod nakakanaug sa lantsa didto sa pantalan sa Surigao city Boulevard, sa barangays Taft, Surigao City alas 3:00 sa hapon niadtong miaging adlaw.

Ang biktima, giilang si RUEL GANSON y TUMALA, 30 – anyos, minyo, ug usa ka konsehal sa barangay Cagniog, Surigao City.Subay sa imbestigasyon, tulo ka wala mailhing lalaki ang mipatay sa biktima. Ang report nag-ingon nga ang biktima bag-o lang nakaabot sa Surigao City gikan sa San Jose. Dinagat Province, sakay sa usa ka lantsa.

Sa iyang pagkanaug, usa sa mga suspek ang paspas nga mipaduol sa biktima ug wala nay daghang istorya, gipusil dayon kini tumong sa wala nga dalunggan.Nakadagan pa ang biktima, apan gigukod kini sa killer. Ug tungod kay samaran, natumba ang biktima ngadto sa sementong dalan busa naapas kini sa killer.

Ug dihang naapsan,gipabuthan dayon kini sa killer makatulo, busa namatay kini diretso.Ang killer, may duha pa ka mga kauban, apan didto ra sa unahan naghulat daan ug pag abot sa killer, paspas silang misibat paingon sa wala matino nga direksyon sakay sa usa ka pula nga Crypton motor cycle nga walay plate number.

Upat ka basiyo sa bala sa kalibre 45 nga pistola ang narekober sa mga sakop sa SOCO didto sa lugar sa krimen. Ang patay ng lawas sa biktima gidala dayon ngadto sa Nilo Funeral Homes alang sa post mortem examination.Matud sa pulis report, naglusad na ug “manhunt operation” ang Surigao City Police batok sa wala mailhi ug wa mahibaw-i diin paingon nga mga suspek.

Read More...