Nakit-an na apan wala nay kinabuhi ang British national nga unang gituohang gi-kidnap dihang miadto kini sa probinsya sa Bukidnon niadtong Nobyembre 22, 2007.
Apan sa pagsubay sa pulisya, nasuta nga si David Brash, 62-anyos, minyo ngadto sa usa ka Analyn Brash y Batalyer, 23-anyos; Filipino ug molupyo sa Purok 4, Brgy. Libertad, Butuan City, wala diay gi-kidnap kondili gituyo kini pagpatay dayon gisunog ang lawas.
Matud ni P/Chief Supt. Jaime E. Milla, usa ka halapad nga pagpangita ang gipahigayon karon sa Butuan City Police Station 3 pinanguluhan ni P/Senior Inspector Reynante N. Sibayton, batok sa duha ka mga suspetsado nga giilang sila si Reynante Prado ug Noel Noja nga maoy gisuspetsahang mipatay ug misunog sa lawas sa British national nga gikataho usab nga usa ka misyonaryo.
Kahinumduman nga niadtong alas 10:25 sa Nobyembre 27, 2007, ang asawa nga si Analyn Brash mitaho sa Butuan City Police Station 3 nga nawala ang iyang bana niadto pang Nobyembre 22, apan mihangyo kini sa kapolisan nga itago una ang maong impormasyon samtang iya pang gitino ang giadtoan sumala pa sa iyang bana.
Pagka-Nobyembre 30, mibalik ang asawa ngadto sa kapolisan ug mihangyo nga ang hitabo andam na niyang pormal nga ipatala. Sa Iyang asoy sa pulisya, si Mrs. Brash misulti nga milarga ang iyang bana gikan sa Butuan City paingon sa usa ka wala masayring dapit sa lalawigan sa Bukidnon kay miresponde kini sa tawag sa usa ka higala nga nangayo’g hinabang salapi sanglit nadisgrasya kini sa sakyanan. Gikan niadto sumala sa babaye, wala na mipauli sa ila ang iyang bana. Apan pagka-alas 4:00 sa hapon didto sa Purok 7B, Sitio Lucahon, Brgy. Tagapua, San Francisco, Agusan del Sur; usa ka patay nga lawas nga nadunot na ang lawas, ang napalgan. Gituohan nga ang nakit-an mao ang lawas sa nawala nga Briton.
Usa ka team sa kapolisan ang gipaadto aron mopahigayon sa SOCO investigation ug napalgan sa Crime Scene ang usa ka pitaka nga halos nahurot pagkasunog ug sulod niini ang mga ID’s nga gipanag-iyahan sa biktima.
Ang naugkat nga lawas, gidala sa Crime Laboratory 13 alang sa dugang pagsusi.
Ug tuod man , sa gipahigayong dugang pag-imbestiga ug operation ni P/SSupt. Admirante Josue, nasikop gyod ang gituohang mastermind nga mao ra usab diay ang asawa.
Sumala sa kapolisan, ang suspek nga asawa, miangkon nga siya ang mastermind sa pagpatay sa Briton. Gitug-an pod sa babaye ang mga pangalan sa duha pa ka mga suspetsado nga iyang gisugo sa pagpatay sa British agig panimalos matud pa, sa pag-abusar ug pagpangmaltrato niini ngadto sa babaye.
Gimugna na ang usa ka tracker team sa kasamtangan aron pangitaon gyod ang duha pa ka mga suspetsado.
Read More...
